धाराशिव बसस्थानक परिसरातील मोटारसायकल चोरीचा पर्दाफाशस्थानिक गुन्हे शाखेची कारवाई; दोन आरोपी जेरबंद, चार दुचाकी जप्त
धाराशिव बसस्थानक परिसरातील मोटारसायकल चोरीचा पर्दाफाशस्थानिक गुन्हे शाखेची कारवाई; दोन आरोपी जेरबंद, चार दुचाकी जप्त
धाराशिव शहरातील बसस्थानक परिसरातून मोटारसायकली चोरी करणाऱ्या दोन आरोपींना स्थानिक गुन्हे शाखेच्या पथकाने अटक करून त्यांच्याकडून चार चोरीच्या मोटारसायकली जप्त केल्या आहेत. या कारवाईमुळे शहरातील वाहन चोरीच्या घटनांवर आळा बसण्यास मदत होणार आहे.
दि. २२ मे २०२६ रोजी स्थानिक गुन्हे शाखेचे पथक मालमत्तेविषयक गुन्ह्यांतील आरोपींची माहिती घेत सरकारी वाहनाने पेट्रोलिंग करत असताना धाराशिव शहर पोलीस ठाणे हद्दीत आले होते. यावेळी पथकाला गोपनीय बातमीदारामार्फत तसेच तांत्रिक विश्लेषणातून माहिती मिळाली की, दोन संशयित इसम अंबाला हॉटेलसमोरील चौकात चोरीच्या मोटारसायकलींसह थांबले आहेत.
मिळालेल्या माहितीच्या आधारे पथकाने सायंकाळी सुमारे ५ वाजण्याच्या सुमारास घटनास्थळी धाव घेत दोन्ही संशयितांना ताब्यात घेतले. चौकशीत त्यांनी आपली नावे राजेश उर्फ राजा परमेश्वर बनसोडे (वय २१, रा. साठे नगर, धाराशिव) व अतिष हनुमंत सगर (वय २२, रा. भक्ती मार्ग, सांगोला चौक झोपडपट्टी, पंढरपूर, जि. सोलापूर, सध्या रा. गावसूद, ता. जि. धाराशिव) अशी सांगितली.पोलिसांनी मोटारसायकलींबाबत अधिक चौकशी केली असता आरोपींनी त्या चोरी केल्याची कबुली दिली.
त्यानंतर पोलिसांनी आरोपींकडून अंदाजे ६० हजार रुपये किमतीच्या चार मोटारसायकली जप्त केल्या. पुढील कारवाईसाठी आरोपींना जप्त वाहनांसह आनंदनगर पोलीस ठाण्याच्या ताब्यात देण्यात आले आहे.
सदरील कारवाई पोलीस अधीक्षक श्रीमती रितु खोखर यांच्या मार्गदर्शनाखाली पोलीस निरीक्षक विनोद इज्जपवार यांच्या आदेशानुसार सपोनि अमोल मोरे, पोहेकॉ बळीराम शिंदे, अमोल चव्हाण, राहुल नाईकवाडी, चालक पोलीस अंमलदार विनायक दहीहंडे तसेच पोलीस अंमलदार बिराजदार यांच्या पथकाने केली.
