अर्चना पाटील तेर गटातून निवडणूक लढवणार

अर्चना पाटील तेर गटातून निवडणूक लढवणार

धाराशिव – नाही.. हो… नाही म्हणत भारतीय जनता पार्टीने तेर गटातून अर्चना पाटील यांना उमेदवारी दिली असून ए फॉर्म असलेल्या जया नाईकवाडी यांनी अर्ज मागे घेतल्याने अर्चना पाटील यांना भाजपची उमेदवारी मिळाली आहे. मात्र ही उमेदवारी देताना भारतीय जनता पार्टीने आपल्याच म्हणजेच स्वतःच्या पक्षाच्या पार्टी कॉन्स्टिट्यूशन च्या नियमांना मूठ माती दिली आहे. राजकीय पक्षाकडून उमेदवारी हवी असल्यास त्या पक्षाचे सक्रिय सदस्य असणे महत्वाचे आहे. आणि भारतीय जनता पार्टीच्या संविधानानुसार सक्रिय सदस्य असण्यासाठी पक्षात तीन वर्ष काम केलेले असणे आवश्यक आहे. अर्चना पाटील यांनी 2024 मध्ये राष्ट्रवादी काँग्रेसकडून लोकसभा निवडणूक लढवली होती. सध्या 2026 मध्ये त्यांना भाजपची उमेदवारी मिळाली आहे. दीड वर्षापूर्वी एका राजकीय पक्षाचे सदस्य असताना आणि भारतीय जनता पार्टीच्या सक्रिय सदस्य नसताना त्यांना पक्षाने उमेदवारी दिल्याने हा पक्षीय संविधानाच्या तरतुदीचा भंग असून हा राजकीय, नैतिक, संवैधानिक चर्चेचा विषय असून भारतीय जनता पक्ष स्वतःच्या पक्षाचे संविधान पाळत नसल्याची टिका या माध्यमातून होऊ शकते.

याबाबत भाजपचे जिल्हाध्यक्ष दत्ता कुलकर्णी यांची प्रतिक्रिया घेण्याचा प्रयत्न केला मात्र त्यांची प्रतिक्रिया मिळू शकली नाही. तर पक्षाच्या इतर पदाधिकाऱ्यांना या संवैधानिक तरतुदीबाबत माहिती नसल्याने दिलेली उमेदवारी कायदेशीर आहे की नाही हे कळू शकत नाही. मात्र पक्षाच्या वतीने अधिकृत प्रतिक्रिया आल्यास वाचकांसाठी ती प्रसिद्ध करण्यात येईल. तसेच सक्रिय सदस्यत्वाची तरतुदी बाबतची माहिती भारतीय जनता पक्षाच्या अधिकृत वेबसाईट वर उपलब्ध असलेल्या माहितीवरून देण्यात आली आहे.